Diwrnod 20 - Dydd Sadwrn, Mawrth 24, 2007

Nôl adre.

Dros yr wythnosau diwethaf, rydym wedi casglu pob math o wybodaeth am arferion darllen pobl, drwy drefnu arddangosfeydd, gweithdai a gwahanol ddigwyddiadau eraill.

Un canlyniad diddorol o'r ymchwil yw pa mor bwysig y mae nain a taid wrth annog plant ifanc i ddarllen. Dywedodd llawer o'r bobl hyn wrthym mai nhw oedd yr unig bobl oedd yn darllen gyda'i wyrion neu wyresau, ac mai nhw oedd yr unig rai oedd yn prynu llyfrau fel anrhegion iddynt. Roedd hefyd yn ddiddorol nodi fod pobl yn gweld llyfrgelloedd fel y ffordd gorau i hybu darllen, hyd yn oed os nad oeddent yn mynd i lyfrgell eu hunain!

Y peth mwyaf positif oedd yr 'Ydi' cadarnhaol iawn i'r cwestiwn: A yw darllen yn bwysig? Wrth ofyn iddynt esbonio pam, roedd y sylwadau yn cynnwys:

mae'n estyn eich gorwelion
mae'n dysgu pethau newydd i chi
mae'n rhoi cymorth i chi wella'ch bywyd
mae'n gwneud i chi ymlacio
mae'n hwyl
mae'n eich ysbrydoli

Gobeithio y parha'r gyfres Stori Sydyn i wneud hyn.

Hwyl fawr!

Diwrnod 19 - Dydd Gwener, Mawrth 23, 2007

Diwrnod olaf prosiect Cymunedau'n Darllen yn Abertawe.

Mae wedi bod yn gyfnod prysur dros ben, ond dyma ni wedi cyrraedd y diwrnod olaf. Rydym yng nghanolfan siopa'r Quadrant unwaith eto heddiw, a dwi'n edrych ymlaen oherwydd fe gawsom ni ymateb gwerth chweil ddoe.

Roedd yn syniad grêt i ofyn i Lyfrgell Abertawe ymuno â ni ar y stondin, oherwydd mae pobl lleol wedi cael y cyfle i ofyn cwestiynau am adnoddau'r llyfrgell a rhai wedi ymaelodi. Roedd llawer yn poeni am y ffaith fod llyfrgell y dre'n symud, felly roedd yn gyfle i'r staff esbonio fod y lleoliad newydd yn mynd i wella'r gwasanaeth.

Ar stondin Stori Sydyn, cawsom gyfle i siarad wyneb-yn-wyneb â bobl am y gyfres a disgrifio'r llyfrau unigol. Mae'n grêt cael ystod mor eang o deitlau i sôn amdanynt, ac i gael gymaint o wahanol fathau o lyfrau, gan fod rhamant at ddant rhai, neu bywgraffiadau'n siwtio eraill.

Diwrnod 18 - Dydd Iau, Mawrth 22, 2007

Penderfynais y byddai'n syniad da i drio cyrraedd gymaint o bobl â phosib drwy gymryd gofod arddangos mewn canolfan siopa. Y syniad oedd bod y bobl oedd yn mynd i ganolfan siopa ddim o reidrwydd yn ddarllenwyr brwd neu'n bobl oedd yn ymweld â llyfrgelloedd, ac fel hyn y byddai'n bosib hybu'r llyfrau i'r cyhoedd.

Gyda hyn mewn golwg, cawsom ofod yng nghanolfan siopa'r Quadrant reit yng nghanol y ddinas, a rhoddwyd gwahoddiad i Lyfrgell Abertawe ymuno â ni er mwyn dangos beth oedd ar gael mewn llyfrgelloedd erbyn hyn. Mae rhai pobl dal yn meddwl fod llyfrgelloedd yn lefydd diflas a llym, ac mae hyn wedi bod yn ddelwedd anodd iddynt gael gwared ohono. Ond y dyddiau hyn, mae llyfrgelloedd yn adnodd gwerthfawr i'r holl gymuned ei ddefnyddio, a does dim rhaid bod yn ddistaw trwy'r adeg!

Yn y pnawn, daeth Lleucu i gymryd drosodd ar y stondin ac fe es i fyny i'r Dragon Arts and Learning Centre ble'r oeddem wedi trefnu i Lynne Barrett-Lee, awdur un o gyfres Stori Sydyn y llynedd ac awdur llyfr Fiona Phillips, A Day to Remember, yn gwneud gweithdy ysgrifennu creadigol.

Mae'r Dragon Arts and learning centre yn darparu dosbarthiadau addysg a chelf a chyfleon eraill i unrhyw un sydd wedi bod yn ddigartref neu wedi profi unrhyw fath o waharddiad cymdeithasol. Maen nhw'n helpu'r unigolion hyn i ennill cymwysterau am y gwaith y maent yn ei wneud adref ac yn y ganolfan.

Siaradodd Lynne gyda'r grwp am sut y mae hi'n rhoi stori at ei gilydd, a rhoddodd ambell awgrym iddynt am ble i ddechrau gyda stori. Roedd sawl aelod o'r grwp eisiau gwybod sut aeth ati i gyhoeddi ei gwaith, ac esboniodd Lynne am y ffordd gorau i fynd o'i chwmpas hi.

Roedd y grwp yn un brwdfrydig iawn, ac wrth i Lynne gael hoe fach cawsant gyfle i sgwennu ei storïau ei hunain. Yn debyg i'r grwp yn y carchar, roedd y gwaith yn onest iawn - weithiau'n ysgytiol. Roedd rhai storïau'n disgrifio trais a homoffobia, camddefnydd o gyffuriau ac alcohol a dieithriad. Er bod dim un o'r grwp yn barod i ddweud fod y darnau'n hunangofiannol, roedd yn amlwg fod rhai ohonynt yn sgwennu o brofiad personol.

Ar ddiwedd y sesiwn, cafodd Lynne syrpreis arbennig wrth i un aelod o'r grwp oedd wedi cymryd lluniau ohoni ar ddechrau'r gweithdy ei chyflwyno gyda llun wedi'i fframio ohoni hi a'r grwp i gofio'r diwrnod. Diolch i bawb yn y ganolfan am eu help.

Dydd Mercher, Mawrth 21, 2007

Mae Dad yn 60 heddiw - PENBLWYDD HAPUS Dad!

Newid hollol o ddoe, ac heno rwyf wedi bod yn Ysgol Gynradd Catwg, ger Castell Nedd er mwyn rhoi copïau o'r llyfrau i Sefydliad y Merched, sy'n helpu ni i rhoi'r llyfrau Stori Sydyn allan.

Pryd cyrhaeddais yr ysgol i gyfarfod â Pam Muir, doeddwn i ddim yn disgwyl gweld cymaint o bobl - mae'n rhaid fod yna tua 100 o ferched yn neuadd yr ysgol!

Mae aelodau'r WI yn mynd i ddarllen y llyfrau ei hunain, ac yna ei pasio ymlaen i ffrindiau a theulu sydd efallai allan o'r arferiad o ddarllen. Mae grwpiau yn Aberystwyth ac yng NGhaernarfon eisoes wedi gwneud hyn. Dywedodd un ddynes wrthyf ei bod yn mynd basio'r llyfr ymlaen i'w mham, oedd yn arfer mwynhau darllen yn fawr ond sydd bellach yn dioddef o clefyd Alzheimer's. Tydi hi ddim yn gallu darllen mwy nag ychydig dudalennau o lyfr bellach, ond roedd hi'n meddwl efallai y byddai'n medru gorffen un o'r Storïau Sydyn.

Diwrnod 16 - Dydd Mawrth, Mawrth 20, 2007

Tro Rhodri i ymweld â'r carchar heddiw, gan ein bod ni'n rhedeg gweithdy yng ngharchar Abertawe gyda'r awdur Niall Griffiths.

Mae Carchar Abertawe yn garchar Categori B, ac y mae'n dal dynion sydd naill ai wedi eu cadw yn y ddalfa gan y llysoedd, wedi ei dedfrydu neu wedi eu canfod yn euog.

Wrth ddechrau meddwl am y gweithdai yma yn y carchar, es ati i ofyn i swyddogion addysg y carchardai pa fath o lyfrau oedd y carcharorion yn hoffi ei darllen. Yn ddigon eironig, 'thrillers' trosedd ac yn enwedig trosedd go iawn oedd yn apelio fwyaf! Felly fe benderfynais mae llyfr Niall Griffiths, comedi du am ddyn yn rhedeg i ffwrdd o Lundain gyda 'gangster' ar ei ôl fyddai'r dewis gorau ar gyfer y gweithdai yma.

Pythefnos yn ôl, aeth Rhodri a Niall i'r carchar am y tro cyntaf er mwyn rhoi copïau o'r llyfrau allan ac i Niall gael cyflwyno ei hun fel awdur, gan esbonio'r hyn oedd o'n ei wneud o ddydd i ddydd a siarad am ei lyfrau eraill. Yna fe osododd y sialens o sgwennu 'Stori Sydyn' o ddim mwy na 500 gair, gan ddweud y byddai'n dod yn ôl yn ystod Wythnos Cymunedau'n Darllen er mwyn dewis yr un gorau i dderbyn gwobr.

Dywedodd Rhodri fod yr hogia'n reit onest gyda Niall am y llyfr - dywedodd un iddo fwynhau'r llyfr yn arw, ond fod y diwedd yn sâl! Dwi'n meddwl fod Niall yn oce am y peth!

Gweithiodd y sialens sgwennu yn arbennig o dda. Roedd rhai ohonynt yn straeon emosiynol dros ben, yn dod yn syth o'r galon, ac mae llawer o'r dynion yma wedi cael profiadau ofnadwy. I ryw raddau, roedd yn esbonio sut y bod rhai o'r dynion deallus a senstif yma wedi darganfod eu hunain yn y fath sefyllfa.

Dwi'n gobeithio y cawn ni gyfle i roi rhai o'r straeon ar y blog yma.

Diwrnod 15 - Dydd Llun, Mawrth 19, 2007

Helo Abertawe!

Wythnos arall o tref arall a dyma ni yma yn cynnal Wythnos Cymunedau'n Darllen yn Abertawe.

Roedden ni'n brysur iawn heddiw, a phawb yn gorfod rhoi help llaw i fynd a'r llyfrau i'r busnesau oedd yn cymryd rhan. Abertawe yw'r unig ddinas a'r lle mwyaf i ni gynnwys, felly roedd hi'n dipyn anoddach i ddod o hyd i bobman. Ond roedd pawb yn grêt - mae i weld yn le cyfeillgar iawn a phawb yn fodlon helpu, hyd yn oed wedi i mi fynd ar goll yn trio dod o hyd i Ysgol Gymunedol Townhill!

Unwaith eto, roedd pob math o fusnesau'n cymryd rhan - o'r caffi Starbucks yng Nghanolfan Siopa Fforestfach i dafarn y Villiers' Arms, Zest Cafe Bar wrth y dwr a syrjeri deintyddol Alexandra Road yn Gorseinon.

Diwrnod 12 - Dydd Gwener, Mawrth 16, 2007

Ar yr un pryd a gweithdy Lindsay ddoe, cynhaliwyd bore coffi gan CYD (Cymdeithas y Dysgwyr), un arall o'n partneriaid ni ar y prosiect hwn. Cafodd aelodau'r gymdeithas y cyfle i sgwrsio â Caryl Lewis am ei Stori Sydyn, sef Y Rhwyd.

Mae Caryl yn awdures boblogaidd iawn yng Nghymru, wedi iddi gipio Gwobr Llyfr y Flwyddyn am ei hail nofel, Martha, Jac a Sianco yn 2005. Mae hi o Geredigion hefyd, ac wrthi'n cyhoeddi ei trydedd nofel, Y Gemydd. Dwi'n edrych ymlaen i'w ddarllen. Fe wnes i fwynhau Y Rhwyd, roedd o'n un o'r storïau 'na lle roeddech chi o hyd yn ceisio dyfalu beth oedd am ddod nesaf, ac roedd y stori'n un fodern iawn, gan ddefnyddio negeseuon testun, 'chatrooms' cyfrifiadurol ac ati.

Fel y dywedais ar ddechrau'r prosiect yma, mae'r llyfrau Stori Sydyn yn boblogaidd iawn gyda dysgwyr. Oherwydd fod y iaith yn iaith bob dydd, does dim rhaid i ddysgwyr fod yn mynd i'r geiriadur bob munud, sy'n helpu iddynt fwynhau darllen yn y Gymraeg.

Trefnodd Jaci Taylor gwis Stori Sydyn fin nos, ble'r oedd pum tim yn cystadlu yn erbyn ei gilydd i weld pwy oedd yn cofio'r mwya' am y llyfrau - ac wrth gwrs, roedd yn gyfle i ymarfer siarad Cymraeg!

Diwrnod 11 - Dydd Iau, Mawrth 15, 2007

Tri digwyddiad yn Aberystwyth heddiw.

Y cyntaf oedd gweithdy gydag awdures The Rubber Woman, Lindsay Ashford.

Gan gydweithio â Geraldine Taylor, y tiwtor sgiliau sylfaenol, a Derval Casey, ymgynghorydd dysgu yn y gweithle, darllenodd Lindsay (sy'n byw y tu allan i Aberystwyth yn Borth) ddarnau o'i llyfr a cafodd y grwp y siawns i'w holi. Roedd yn ddiddorol clywed am sut y cychwynodd Lindsay sgwennu ffuglen trosedd, am ei gradd mewn troseddeg a'r ymchwil aeth i mewn i The Rubber Woman. Mae'n debyg i Lindsay ddilyn gweithwraig cymunedol yn ei gwaith wrth iddi drio cael puteiniaid i ffwrdd o'r strydoedd yn Birmingham, ac iddi ddysgu llawer am y cyffuriau sy'n cadw'r merched yn gaeth i fywyd mor drychinebus.

Cafodd y dysgwyr i gyd gopi o'r llyfr ar ddiwedd o sesiwn, ac mae'r tiwtor yn mynd i ddarllen y llyfr fel grwp, gyda'r dysgwyr yn dilyn yn eu copïau unigol. Wedyn mi fyddent yn cael trafodaeth am y llyfr ac yn ysgrifennu ychydig yn dweud eu barn. Bydd y darnau yma wedyn yn cael ei gyrru i ni. Dwi'n edrych ymlaen i weld eu sylwadau.

Diwrnod 10 - Dydd Mercher, Mawrth 14, 2007

Mae'n benblwydd arna i heddiw!

Gawsom ni hwyl yn mynd o gwmpas yr holl gaffis, tafarndai a busnesau eraill oedd yn cymryd rhan yn yr ymgyrch - mae'n neis cyfarfod yr holl bobl rydych wedi bod yn siarad â hwy dros y ffôn a dangos y llyfrau iddyn nhw. Roedden nhw i gyd yn meddwl fod yr ymgyrch yn syniad da. Doeddwn i ddim yn 'nabod Aber yn rhy dda cyn hyn, ond dwi'n dechrau ffeindio fy ffordd o gwmpas erbyn hyn!

Y ffotograffydd Keith Morris oedd yn ein helpu gyda'r lluniau. Roedd rhai ohonynt yn ddigon bodlon, yn perfformio o flaen y camera yn syth, tra roedd angen annog rhai eraill i wenu gyda rhai o jôcs difrifol Keith (sori Keith!)

Diwrnod 8 - Dydd Llun, Mawrth 12, 2007

Rydym wedi cyrraedd Aberystwyth yr wythnos hon. Fe gawsom ni ymateb da iawn gan bob math o fusnesau yn Aber, gyda dros 15 yn cymryd rhan yn yr ymgyrch drwy arddangos posteri neu lyfrau, felly heddiw aethom o gwmpas y busnesau er mwyn dosbarthu deunydd ac esbonio ychydig mwy am y cynllun. Roedd siopau trin gwallt, caffis, meddygfeydd a syrjeris deintyddol yn cymryd rhan, yn ogystal â'r ysgol gynradd leol ym Mhenparcau, Llwynyreos. Fel rhan o'r ymgyrch 'Darllen Miliwn o Eiriau yng Nghymru', darparwyd copïau o'r llyfrau Stori Sydyn gyda'r nifer o eiriau ar y clawr, er mwyn i'r rhieni gael cyfrannu at y cyfanswm! Bum hefyd yn y Ganolfan Hamdden ac yn Coleg Ceredigion yn trefnu arddangosfeydd. Gyda'r holl gefnogaeth, dwi'n gobeithio y bydd y cyfryngau lleol yn pigo fyny ar neges Stori Sydyn ac y cawn luniau yn y papur newydd.

Diwrnod 7 - Dydd Sul, Mawrth 11, 2007

Lot o hwyl mewn Diwrnod i’r Teulu draw yn Galeri, Caernarfon. Mae’r diwgyddiad yn cael ei drefnu deirgwaith y flwyddyn gan Cyswllt Teulu i deuluoedd sydd a phlant gyda awtistiaeth fwynhau diwrnod i’r teulu oll, ac mae cyfle i weld ffilm a chymryd rhan mewn gweithdy cerdd.

Fel rhieni prysur, doedd gan yr oedolion oedd yna ddim llawer o amser i ddarllen – dywedodd un ddynes ei bod wedi bod yn trio gorffen yr un llyfr ers dros flwyddyn! Dywedodd un arall y byddai’n hoffi cymryd llyfr i’w mham, oedd mewn tipyn o oed, gan fod y print bras yn haws i’w ddarllen. Roedd y syniad y tu ôl i Stori Sydyn wir yn apelio i’r teuluoedd prysur yma, ac roeddwn wrthi drwy’r dydd yn esbonio’r gwahanol lyfrau oedd ar gael a’r syniad y tu ôl i’r gyfres.

Diwrnod 4 – Dydd Iau, Mawrth 8, 2007

Diwrnod prysur iawn heddiw.

Am 9.30am aethon ni draw i Ganolfan Noddfa ar ystad Ysgubor Goch yng Nghaernarfon. Mae grwp o famau yn mynd a’i plant yno pob wythnos i sesiwn Ti a Fi, a cawsom ein gwahodd gan y ganolfan i siarad â’r mamau tra roedd y plant yn mwynhau ei chwarae!
Trafododd Bethan Gwanas ei llyfrau ac yn arbennig Os Mêts, gan ofyn i’r merched am eu harferiadau darllen. Cafodd pob mam gopi o’r llyfrau i fynd adre ac mi fydd yn dda clywed eu barn unwaith y maent wedi cael yr amser i ddarllen y llyfrau rhwng poteli a napis!

Aeth Bethan finnau ymlaen wedyn i lyfrgell Caernarfon, ble mae grwp o famau ifanc (i gyd rhwng 15 a 18 oed) yn cwrdd i siarad gyda’r fudwraig. I ddechrau, roedd y genod ychydig yn swil o Bethan, ond yn y diwedd roedd yn troi allan fod llawer ohonynt wedi darllen rhai o’i llyfrau yn yr ysgol, felly roeddent yn falch iawn o gael y cyfle i ddarllen y llyfr diweddara a siarad gyda Bethan am y profiad o fod yn fam ifanc.

Yn y prynhawn, roedd gennym ddigwyddiad arbennig yn y bar yng nghanolfan creadigol Galeri. Cyfle oedd hwn i’r cyhoedd ddod i wrando ar Bethan Gwanas yn cael ei holi am y llyfr newydd gan Luned Emyr, cyflwynydd y Sioe Gelf ar S4C. Cawsom ddigwyddiad hwylus iawn, gyda phawb yn eistedd yn gyfforddus gyda’i coffi ar y soffa gan wrando ar y sgwrs hamddenol rhwng y ddwy ferch. Roedd yn ddiddorol gweld pobl yn pasio ac yn holi beth oedd yn mynd ymlaen, ac erbyn y diwedd, roedd y gynulleidfa wedi dyblu.

Diwrnod 3 – Dydd Mercher, Mawrth 7, 2007

Cynhaliwyd bore coffi a cwis Stori Sydyn gan CYD ddoe. Mae llyfrau Stori Sydyn yn apelio’n fawr i ddysgwyr, gan fod y iaith yn iaith pob dydd a’r llyfrau’n eithaf byr. Rwyf wedi cael llawer o ddysgwyr yn dwedu wrthyf faint mor falch ydynt bod mwy o lyfrau Stori Sydyn wedi’i cyhoeddi eto’r flwyddyn hon, gan eu bod wedi darllen y pedwar arall!

Yn Hwyrach - Diwrnod 2, Dydd Mawrth, Mawrth 7 2007

Pnawn ‘ma, roedd Gwenan yn brysur yn mynd o gwmpas y siopau, y swyddfeydd, ystafelloedd aros y deintyddion a’r meddygfeydd, tafarndai, swyddfeydd post a chanolfannau eraill sydd wedi cytuno i gymryd rhan yn yr ymgyrch Cymunedau’n Darllen drwy arddangos llyfrau a rhoi posteri i fyny.

Mae’r ymateb wedi bod yn grêt, mae pobl i weld yn hoffi’r syniad, ac yn teimlo’n gryf fod hwn yn gyfle da i ymestyn y cyfleoedd sydd gan bobl i bigo llyfr i fyny.

Diwrnod 2 – Dydd Mawrth, Mawrth 6, 2007

Fel y dywedais yn y blog olaf, roeddwn i yn yr ysbyty heddiw. Dim byd difrifol – roeddwn i yna i hyrwyddo’r llyfrau ar Radio Ysbyty Gwynedd, gyda Merched Y Wawr.

Roedden ni’n meddwl y byddai’r llyfrau’n ddelfrydol ar gyfer pobl yn yr ysbyty gan eu bod mor hawdd i’w darllen, felly gofynnais i lywydd rhanbarthol Merched y Wawr os y byddai’n fodlon gwneud ychydig o recordio. Rhaid dweud roedd hi’n wych – gyda llais oedd yn gwneud i rywun ymlacio’n syth ond yn fywiog ar yr un pryd. Roedd hi’n ‘one take wonder’ go iawn felly roeddem ni wedi gorffen erbyn amser cinio. Mae Radio Ysbyty Gwynedd, sy’n cael ei redeg gan wirfoddolwyr ac yn gwneud gwaith bendigedig, yn mynd i chwarae’r darnau o’r llyfrau drwy’r wythnos ar eu gwasanaeth 24 awr ac yn mynd i fynd o amgylch y wardiau i weld os ydi rhywun wedi cael blas ar y llyfrau ac eisiau benthyg copi i’w ddarllen.

Dyma lun o Mary ati’n recordio – diolch Mary!

Diwrnod 1 – Dydd Llun, Mawrth 5, 2007

Mae’r wythnos gyntaf o ymgyrch Cymunedau’n Darllen yn dechrau heddiw.

Mae’r paratoadau i gyd wedi’i gwneud ac mae’n bryd dechrau arni o ddifri!

Mae Cymunedau’n Darllen wedi ei drefnu er mwyn hyrwyddo cyfres newydd o lyfrau gan yr Asiantaeth Sgiliau Sylfaenol a Cyngor Llyfrau Cymru, sef Stori Sydyn/Quick Reads, a dros y tair wythnos nesaf, rwy’n gyfrifol am drefnu digwyddiadau yng Nghaernarfon, yn Aberystwyth ac yn Abertawe er mwyn rhoi llwyfan i’r llyfrau yn y gymuned ac annog bobl i fachu llyfr.

Er mai hwn yw diwrnod swyddogol cyntaf yr ymgyrch yng Nghaernarfon, yng ngharchar Altcourse yn Fazakerley, Lerpwl oeddwn i heddiw i ddangos y llyfrau i grwp o Gymry. Dyma’r carchar agosaf i Ogledd Cymru a Chaernarfon, ac felly dyma ble mae llawer o droseddwyr o’r ardal yn mynd.

Mae’n debyg fod gan 75% o’r rheiny sy’n cael eu derbyn i mewn i’r carchar oed darllen sy’n gymharol i blentyn 8 mlwydd oed, sy’n ystadeg brawychus. Felly mae’r llyfrau Stori Sydyn, sydd wedi ei sgwennu’n arbennig ar gyfer egin ddarllenwyr neu ddarllenwyr newydd, yn ddelfrydol, ac roedd y grwp y cwrddais i â nhw yn pendant yn awyddus iawn i gael y cyfle i’w darllen, yn enwedig y rhai Cymraeg. Rydym wedi gadael ffurflenni adborth gyda nhw, felly mi fydd yn ddiddorol cael clywed eu barn am y llyfrau mewn ychydig wythnosau.

Yn aml, mae’n anodd i bobl sy’n gweld darllen yn beth caled ddod o hyd i’r llyfrau ‘na mae pawb yn mwynhau – y straeon arswyd, y rhamant neu hunangofiannau. Mae’r gyfres Stori Sydyn/Quick Reads yn cynnwys pob math o lyfrau. Mae dau o’r llyfrau Cymraeg yn straeon arswyd – un gan Gareth F Williams, Tacsi i’r Tywyllwch, ac un gan Caryl Lewis, Y Rhwyd. Mae Tacsi i’r Tywyllwch yn atgoffa fi o un o’r rhaglenni dau ran ‘na ble mae darnau o gyrff dros y lle i gyd a phethau ofnus yn digwydd mewn corneli tywyll. Mae’r Rhwyd yn chwarae gyda dychmyg rhywun (mewn ffordd da!), yn un o’r llyfrau ‘na sy’n pwyntio’r bys ar bob cymeriad yn y llyfr cyn datgelu pwy yw’r un sydd wir ar fai.

Mae llyfr Bethan Gwanas Os Mêts i gyd am grwp o genod yn mynd ar noson cwennod (neu hen night i chi a fi) – fel allwch ddychmygu, mae pethau’n y mynd ar chwal braidd ac ambell gath yn cael ei gollwng o’r cwd, ond mae na ddigon o hwyl i gael hefyd. Un arall sydd wedi gwneud i mi chwerthin yn uchel (yn gyhoeddus, ga’i ychwanegu) yw un Gary Slaymaker, sy’n rhyw fath o hunangofiant mewn ffordd, yn sôn am sut y daeth o’n gymaint o ffan o ffilmiau, straeon am ei ac o glwb peldroed Caerdydd.

Mae na bedwar llyfr Saesneg hefyd yn y gyfres, i gyd gan awduron sydd â chysylltiad â Chymru. Mae llyfr Fiona Phillips A Day to Remember yn stori rhamant, a stori arswyd sydd gan Niall Griffiths gyda Bring It Back Home. Mae llyfr Tanni Grey-Thompson Aim High yn sôn am ei gyrfa hir a sut mae hi wedi llwyddo i ddisgleirio yn ei maes, a llyfr Lindsay Ashford The Rubber Woman yn stori arswyd arall am lofruddiaeth a puteiniaid ar strydoedd cefn Caerdydd.

Popeth yn barod at fory rwan, ac fy ymweliad â’r ysbyty.